Aşura qiyamında olan bir sıra xüsusiyyətlər Aşuranı digər hadisələrdən
fərqləndirir. O cümlədən, imam Huseyn qiyamında xalis niyyət, İlahi məqsəd, mənəvi
əzəmət, ailə şərafəti, vəfadarlıq, fədakarlıq, paklıq, zillətlə yaşamağı qəbul
etməmək və zalımın qarşısında susmamaq çox aydın görünür. Ona görə də çəkinmədən
deyirik ki, Kərbəla hadisəsinə bərabər bir hadisə nə keçmişdə olmuşdur, nə də gələcəkdə
baş verəcəkdir. Aşura məktəbinin dərsləri Qiyamətə qədər insanlara ibrət
olacaqdır. Bu qiyamın qarşısında müsəlman və kafir, müvəhhid və müşrik, dost və
düşmən təzim edir. Odur ki, imam Huseyn əleyhissəlam hidayət çırağına çevrilmişdir.
Mərhum Şəhriyar çox yaxşı deyib:
Hüseynə yerlər ağlar, göylər ağlar, Bətuli-Mürtəza Peyğəmbər ağlar.
Hüseynin nohəsin dilriş yazanda, Müsəlman səhlidir
ki, kafər ağlar.
Dedik ki, imam Huseyn əleyhissəlamın ailə şərafəti
Aşura qiyamının əbədi yaşaması amillərindən biridir. Kərbəla şəhidlərinin bir
neçə üzvü Peyğəmbər övladıdır. Bilirsiz ki, həzrət Peyğəmbərin (sallallahu əleyhi
və alih) nəsli Xanım Zəhra əleyhasəlamın övladları vasitəsilə olmuşdur.
Ali-İmran surəsinin 61-ci ayəsində bu məsələ öz təsdiqini tapır. Buyurur:
فَمَنْ حَاجَّكَ فِيهِ مِنْ
بَعْدِ مَا جَاءَكَ مِنَ الْعِلْمِ فَقُلْ تَعَالَوْاْ نَدْعُ أَبْنَاءنَا وَأَبْنَاءکُمْ
وَنِسَاءنَا وَنِسَاءکُمْ وَأَنفُسَنَا وأَنفُسَکُمْ
“Sənə göndərilən elmdən sonra (həzrət İsanın əhvalatına) dair səninlə mübahisə edənlərə de: “Gəlin biz də
oğullarımızı, siz də oğullarınızı; biz də qadınlarımızı, siz də qadınlarınızı;
biz də özümüzü, siz də özünüzü (bura) çağıraq!”
Bütün təfsirçilər bu mübarək ayədə Allahın əmrindən
sonra həzrət Peyğəmbərin imam Həsən və imam Huseyn əleyhiməssəlamı öz oğulları
olaraq mübahiləyə aparmasını təsdiq edirlər.
Bu əsasla, Aşura günü imam Həsən əleyhissəlamın
üç oğlu; Abdullah əkbər, Abdullah Əsğər, Qasim ibn Həsən və imam Huseynin iki
oğlu Əli Əkbər və Əli Əsğər əleyhimussəlam və həzrət Zeynəbin iki oğlu, Ovn ibn
Abdullah və Muhəmməd ibn Abdullah Kərbəla vaqeəsində şəhid olmuşlar. Kərbəlada
Yezidin qoşunu həzrət Peyğəmbərin (sallallahu əleyhi və alih) bir oğlu və bir
neçə nəvəsini şəhadətə yetirmişlər. Həmçinin, imam Əli əleyhissəlamın Ümmul-Bənindən
olan dörd oğlu, o cümlədən, həzrət Abbas ibn Əli və Əqilin oğlanları, Muslim
ibn Əqilin oğulları (əleyhimussəlam) şəhadət məqamına çatmışlar.
Bundan əlavə Kərbəla vaqeəsində dörd, ya beş
Peyğəmbər səhabəsi və Əmirəl-möminin Əli əleyhissəlamın iyirmidən artıq seçilmiş
səhabisi də şəhid olmuşlar. Odur ki, Aşura məktəbinin davamlı olmasında Kərbəla
şəhidlərinin ailələrinin şərafəti və paklığı xüsusi yer tutur.
Qəribə burasıdır ki, Peyğəmbər səhabilərini özlərinə
hidayət ulduzu sanan bəzi müsəlmanlar Kərbəlada imam Huseynin müdafiəsində şəhid
olan səhabilər haqda danışmaq istəmirlər. Deməli, dildə ümumi olaraq Peyğəmbər
səhabilərini toxunulmaz və möhtərəm bilirlər, həqiqətdə isə bu hörməti və
ehtiramı yalnız müəyyən səhabiyə nisbət qəbul edirlər. Belə ki, bəzi səhabinin
haqqında hətta kiçik bir nöqsanı belə qəbul etmək, ya eşitmək də istəmirlər,
lakin bəzi digər səhabinin qətlə yetirilməsinə əhəmiyyət vermirlər.
(ardı var)
