Həzrət Əbulfəzl Abbasın (əleyhissəlam) təvəllüd günü

Bismilləhir-Rahmənir-Rahim

Həzrət Əbulfəzl Abbasın (əleyhissəlam) təvəllüd günü

Hicri-qəməri 1446-cı il əzəmətli şəban ayının 4-ü, miladi 2025-ci il fevralın 4-ü həzrət Əli ibn Əbi Talibin (əleyhiməssəlam) dilavər və igid oğlu, imam Huseynin (əleyhissəlam) Kərbəla vaqiəsində döyüşçülərinin sərkərdəsi, şücaət, fədakarlıq, vəfadarlıq, cavanmərdlik rəmzi olan həzrət Qəməri Bəni Haşim Əbul-Fəzlil Abbas əleyhissəlamın təvəllüd günüdür.[1]

Bu gözəl və sevindirici gün münasibətilə öncə intizarında olduğumuz Allah-təalanın yer üzərindəki sonuncu hüccəti mövlamız həzrət Sahib Zamana (Allah Taala onun şərəfli zühurunu tezləşdirsin), eləcə də Əhli-beyt (əleyhimussəlam) məktəbinin mömin bacı və qardaşlarına təbrik deyirik.

Ümid edirik bütün müsəlmanlar bu günün mövludu kimi dini və ictimai həyatlarında həmişə Allah-təalaya, Qurani-Kərimə və İlahi vilayətin öhdəçilərinə itaətkar və vəfalı olsunlar və dini əmrləri yerinə yetirməyi hər bir işdən üstün tutsunlar, Amin ya Rəbbil aləmin.

Həzrət Abbas ibn Əli (əleyhiməssəlam) hicri qəməri 26-cı ildə şəban ayının 4-ü müqəddəs Mədinə şəhərində dünyaya göz açmışdır.

Əziz atası həzrət Əmirul-möminin Əli ibn Əbi Talib əleyhiməssəlam və möhtərəm anası Ummul-Bənin Fatimə bint Hizam Kilabiyyə (əleyhasəlam) olmuşdur.

Həzrət Əbulfəzl Əl-Əbbasın (əleyhissəlam) məşhur adı Əbbasdır  və bir sıra münasibətlə yüksək mənalı ləqəbləri, o cümlədən, Əbul-Fəzl, Əbul-qərəbə, Qəməri Bəni Haşim, Babul-həvaic, Əbdus Saleh və Səqqa olubdur.[2]

O Həzrət gözəl simalı olduğu üçün ona Qəməri Bəni-Haşim ləqəbi vermişlər. Uca boylu, güclü qolları var idi, atın belinə oturarkən dizləri atın boynuna qədər çatardı. Şücaətində həzrət imam Həsən və imam Huseyndən (əleyhiməssəlam) sonra həzrət Əmirul-möminin Əlinin uşaqlarının arasında ən irəlidə dururdu. O Həzrət imam Huseynin (əleyhissəlam) ordusunun başçısı və Kərbəla məzlumunun ələmdarı idi.[3]

Hicri 61-ci il Aşura günü şəhadətə yetdikdə o Həzrətin 34 yaşında olduğunu demişlər. Bu müddətin on dörd ilini öz əziz atası həzrət Əmirəl-möminin (əleyhissəlam) ilə, doqquz ilini sevimli qardaşı imam Həsən Muctəbanın (əleyhissəlam) və on bir ilini imam Huseynin (əleyhissəlam) imamət dövründə yaşamışdır.[4]

Burada Məsum imamların (əleyhimussəlam) həzrət Əbulfəzl Abbasın (əleyhissəlam) ziyarətində bəyan etdikləri olduqca yüksək mənalı ifadələrdən bir necəsini gətirməklə o Həzrətin əzəmətli şəxsiyyətinin düzgün tanınmasında az bir xidmət göstərmək niyyətindəyik. 

السَّلامُ عَلَيْكَ أَيُّهَا الْعَبْدُ الصَّالِحُ الْمُطِيعُ لِلَّهِ وَ لِرَسُولِهِ وَ لِأَمِيرِ الْمُؤْمِنِينَ وَ الْحَسَنِ وَ الْحُسَيْنِ صَلَّى اللَّهُ عَلَيْهِمْ وَ سَلَّمَ السَّلامُ عَلَيْكَ وَ رَحْمَةُ اللَّهِ وَ بَرَكَاتُهُ وَ مَغْفِرَتُهُ وَ رِضْوَانُهُ وَ عَلَى رُوحِكَ وَ بَدَنِكَ

“Salam olsun sənə, ey Allahın saleh bəndəsi!

Allaha, Onun Peyğəmbərinə, Əmirəl-mömininə, imam Həsən və imam Hüseynə (Allahın salavat və salamı olsun onlara) tam itaət edən şəxs!

Salam olsun sənə! Allahın rəhmət, bərəkət, məğfirət və razılığı olsun sənin müqəddəs ruhuna və bədəninə!”

Biz də Məsumlara (əleyhimussəlam) iqtida edərək ərz edirik:

Salam olsun Allahın həqiqi bəndəsinə! Salam olsun vilayət ələmdarına! Salam olsun fədakarlıq simvoluna! Salam olsun Bəni-Haşimin comərd qəhrəmanına!..

Bir daha bütün əzizləri bu gözəl şadlıq və fərəhli gün münasibətilə səmimi təbrik edirik!

İlahi! Muhəmməd və Ali Muhəmmədə möminlərin salam və salavatını yetir, Amin ya Rəbbil-aləmin!