Həzrət Fatimeyi-Zəhranın (ə) şəhadəti

السلام علیک ایتها الصدیقة الشهیدة

Bismilləhir-Rahmənir-Rahim

Peyğəmbərlərin (sallallahu əleyhi və alih) Fatimeyi-Zəhranın (əleyha salam) ziyarətinə gəlməsi

Fatimeyi-Zəhra (əleyha salam) dərk və idrakdan yüksəkdədir

Fatimeyi-Zəhra (əleyha salam) elə bir kəsdir ki, istisnasız olaraq heç bir əqlin və heç bir fikrin onu dərk etməsi mümkün deyildir. İmam (əleyhissəlam) buyurur: “Fatimə yalnız buna görə Fatimə adlandırılıb ki, məxluqlar onun barəsində mərifətdən kəsilmiş və aciz olmuşlar.”

(Fatimə kəlməsinin kökü olan) “fətm” sözünün mənası kəsmək və qırmaq deməkdir. “Xəlq” (məxluq) kəlməsi də ən ümumi məfhum daşıyan ünvanlardandır və hamıya: alimə-cahilə, həkimə-səfehə, insana, cinə və mələklərə aid edilir. Hər bir şeyə “xəlq” ünvanı aid edilə bilirsə, Fatimə (əleyha salam) barəsində mərifətdən aciz edilmiş və kəsilmişdir.

Bütün peyğəmbərlərin (əleyhimussəlam) onun ziyarətinə gəlməsi

Fatimə (əleyha salam) necə bir müqəddəs vücud idi, nə etdi, özü ilə Allah arasında nə iş gördü?! Bunları Allahdan başqa heç kəs bilmir, yalnız onun təsirləri aşkar olur. Təsiri də budur:

وَ إِذَا اسْتَقَرَّ أَوْلِيَاءُ اللَّهِ فِي الْجَنَّةِ زَارَکِ آدَمُ وَ مَنْ دُونَهُ مِنَ النَّبِيِّينَ

“(Ya Fatimə!) Allahın övliyaları cənnətdə qərarlaşan zaman Adəmdən başlamış bütün peyğəmbərlər sənin ziyarətinə gələcəklər.”

Yəni Allahın övliyaları cənnətdə yerləşən zaman Adəm, Nuh, İbrahim, Musa, İsa (əleyhissəlam) və həzrət Xatəm (sallallahu əleyhi və alih) hamılıqla onun ziyarətinə gələcəklər. Budur Fatimeyi-Zəhra (əleyha salam)!

Əmirəl-möminin Əlinin (əleyhissəlam) sonsuz qüssəsi və kədəri

Düşüncə əhli üçün həzrət Əlinin (əleyhissəlam) elə bu bircə cümləsi kifayətdir. Əmirəl-möminin Əli (əleyhissəlam) elə bir kəsdir ki, dünya və axirət onu dizə çökdürə bilmədi, amma (Fatiməni dəfn edən zaman) dedi:

أَمَّا  حُزْنِي فَسَرْمَدٌ  وَ أَمَّا لَيْلِي فَمُسَهَّد

“Ey Allahın Rəsulu! Fatimədən sonra mənim vəziyyətim belədir: – hüznüm, kədərim əbədidir, gecələrim sübhə qədər oyaq qalmaqdır.”[1] Onun kəlamında şişirtməyə yer yoxdur. Deməli, bu hadisədən sonra bir gecə olsun belə, yatmamışdır.

Səbəbi nədir? Səbəbini demək mümkün deyildir!

سَتُنَبِّئُکَ ابْنَتُکَ بِتَظَافُرِ  أمَّتِکَ عَلَى هَضْمِهَا   

“Qızın tezliklə ümmətinin ona zülm etməkdə necə əlbir olduğunu sənə xəbər verəcəkdir.”