Həzrət Əli (əleyhissəlam) imanın meyarı və Quranın həqiqəti

Həzrət Əli (əleyhissəlam) imanın meyarı və Quranın həqiqəti

Əmirul-möminin əleyhissəlamın şəxsiyyəti haqqında Qiyamətə qədər danışmaq olar və bu heç də mübaliğə deyil. İnsan o Həzrətin fəzilətləri haqda danışmaq istərkən heyran qalır ki, hansını desin, nədən başlasın?

Daha təəccüblü budur ki, bu fəzilətlərin əksəri həzrət Rəsuləllah (sallallahu əleyhi və alih) tərəfindən bəyan edilmişdir, üç yüz ayənin nazil olma səbəbi də Əli ibn Əbi Talib (əleyhissəlam) ilə bağlıdır və Həzrətin rəşadətləri hamının gözləri önündə olmuşdur, amma necə olur, Rəsuləllahdan (sallallahu əleyhi və alih) sonra İslam cəmiyyətində inhiraf baş vermiş, mütləq şəkildə İlahi bir şəxsiyyətin imamət və vilayəti Allah-taala tərəfindən möminlər üçün müəyyən edildiyi halda xanəneşin olmuşdur?

Əmirul-möminin (əleyhissəlam) barəsində nəql edilən bir hədisdən müəyyən hissəni təhlil edib, mənasını düzgün düşünsək, Həzrətin haqqında müzakirə olunan bir çox məsələləri dərk edəcəyik.

Bizim bütün çətinliklərimiz Allah-taalanı, Onun Rəsulunu (sallallahu əleyhi və alih), Əmirul-möminini (əleyhissəlam) və İlahi övliyaları layiqincə tanımamağımız səbəbinədir. Əgər onları tanısaq hidayət yolu bizim üzümüzə açılacaq və insan elə bir sürətlə hərəkət edəcəkdir ki, tövsif olması mümkün deyil.

Bu hədisin başlanğıcında Ənəs ibn Malik öncə şəriki olmayan Allaha and içir ki, bu hədisi həzrət Peyğəmbərdən (sallallahu əleyhi və alih) eşitmişdir. Demək, məlum olur olduqca əhəmiyyətli bir məsələdir.

Deyir, özüm Peyğəmbərdən (sallallahu əleyhi və alih) eşitdim ki, buyurdu:

«عِنْوَانُ صَحِيفَةِ الْمُؤْمِنِ حُبُّ عَلِيِّ بْنِ أَبِي طَالِبٍ»

Bu hədisin barəsində gərək çox düşünək. Hədisin zahiri və ibtidai mənası budur ki, Qiyamət günü mömin şəxsin əməl naməsi Əli ibn Əbi Talibin (əleyhissəlam) məhəbbəti ilə möhürlənəcək. Qiyamət günündə namazdan, orucdan, həcdən və sair əməllərdən və ibadətlərdən əvvəl “mömin insanın əməl naməsinin əsas ünvanı və başlığı Əli ibn Əbi Talibin (əleyhissəlam) məhəbbətidir”.

Bu mənaya aydınlıq gətirmək üçün gərək onun kənarında digər hədisləri də nəzərdən keçirək. Bir hədisdə həzrət Peyğəmbər (sallallahu əleyhi və alih) Əmirəl-möminin əleyhissəlama buyurur:

«لا یُحِبُّکَ إلا مُؤمِنٌ و لا یُبغِضُکَ إلا مُنَافِقٌ»

“Ey Əli! Səni ancaq mömin şəxs sevəcək və yalnız münafiq insanın daxilində sənə qarşı kin-küdurət və qəzəb olacaq.”

Başqa bir hədisdə Peyğəmbər buyurur:

«وَلَوْ لا اَنْتَ يا عَلِيُّ لَمْ يُعْرَفِ الْمُؤْمِنُونَ بَعْدي»

“Ey Əli! Əgər sən olmasaydın məndən sonra möminlər tanınmazdılar, çünki mömin şəxsin qeyri-mömindən seçilməsi üçün meyar olmazdı.”

Bu çox təəccüblü bir sözdür! Nə üçün Qiyamət günündə möminin əməl naməsinin ünvanı Əli ibn Əbi Talibin (əleyhissəlam) məhəbbətidir? Ona görə ki, Əli ibn Əbitalibi (əleyhissəlam) sevmədən Allaha məhəbbət etmək və Onu sevmək məna kəsb etmir. Bu söz ancaq iddia və şüar deyil, əksinə çoxlu dəlillərə əsasən, bizim əqidəmizin çox mühüm bir hissəsidir. Əgər bir kəs Əli əleyhissəlama inanmasa, həqiqətdə Allaha, dinə və Qurana inanmamışdır.

Daha bir hədisdə həzrət Peyğəmbər (sallallahu əleyhi və alih) Əmirəl-möminin əleyhissəlama buyurdu:

«مَثَلُکَ فِی الناسِ کَمَثل سُورةِ «قُل هُوَ اللهُ اَحَدٌ»»

“Sənin məsəlin “Qul huvəllahu əhəd” məsəli kimidir, necə ki, əgər bir şəxs “Qul huvəllahu əhəd” surəsini bir dəfə oxusa, ona Quranın üçdə bir hissəsinin oxunması savabını verərlər. Əgər iki dəfə oxusa, Quranın üçdə iki hissəsinin və əgər “Tövhid” surəsini üç dəfə oxusa, Quranı bir dəfə kamil xətm edən kimidir. Demək, əgər bir şəxs səni dildə qəbul etsə, onun üçdə bir imanı düzgündür. Əgər səni dili və qəlbi ilə qəbul etsə, üçdə iki imanı düzdür. Əgər bir şəxs səni dili və qəlbi ilə qəbul etmiş olsa və əli ilə sənə yardım etsə, imanı kamildir.”