Ramazan ayının iyirmi dördüncü gününün duasının qısa şərhi

Bismilləhir-Rahmənir-Rahim

Ramazan ayının iyirmi dördüncü gününün duasının qısa şərhi

اللَّهُمَّ إِنِّي أَسْأَلُكَ فِيهِ مَا يُرْضِيكَ وَ أَعُوذُ بِكَ مِمَّا يُؤْذِيكَ وَ أَسْأَلُكَ التَّوْفِيقَ فِيهِ لِأَنْ أُطِيعَكَ وَ لا أَعْصِيَكَ يَا جَوَادَ السَّائِلِينَ

“Əllahummə inni əs`əlukə fi­hi ma yurzikə və əuzu bikə mim­ma yu`zikə və əs`əlukət təv­fiqə fihi li ən utiəkə və la ə`siyəkə, ya cəvadəs-sailin.”

“İlahi! Bu gün Səndən, Səni razı salan əməlləri istəyirəm və Sənə əziyyət verən əməllərdən Sənə pənah aparıram; İstəyirəm Sənə itaət etməyə və günahdan çəkinməyə məni müvəffəq edəsən; Ey hacəti olanlara bəxşiş edən və səxavətli Allah!”

Duanın əsas kəlmələri və ifadələri:

Səni razı salan; Sənə əziyyət verən; İtaət etmək müvəffəqiyyəti; Hacəti olanlara bəxşiş edən.

Duanın möminlərə sifariş və peyğamları:

1-Həzrət Sadiq əleyhissəlam: Hər kəs Allahın əməlləri müqabilində razı və təslim olmaq məqamına çatsa, bəndəliyin bütün mərtəbələrinə çatmışdır; (Misbahuş-şəriət və miftahul-həqiqət, səh. 483)

2-Allah-taalaya kimsə əziyyət edə bilməz, Allah belə sifətlərdən pak və uzaqdır, əziyyət etmək ifadəsi kinayədir və əməlin Allah dərgahında xoşagəlməzliyini çatdırır; (Əl-Mizan, cild-6, səh. 508)

3-Çalışmadan və zəhmət çəkmədən müvəffəqiyyətə çatmaq üçün dua etmək səmərə verməz; Həzrət Rza əleyhissəlam: Hər kəs çalışmadan və səy göstərmədən Allahdan müvəffəqiyyət diləsə, özünü istehza və məsxərə etmişdir. (Biharul-Ənvar, cild-75, səh. 356)

4-Paxıllıq hər nə qədər həqarət, zəiflik və kiçiklik nişanəsidirsə, bəxşiş etmək və səxavətli olmaq da insanda iman və yüksək şəxsiyyət nişanəsidir. (Şərafətul-əsxiya və rəzalətul-buxəla, səh. 4-5)

İlahi! Müqəddərat müqabilində möminlərin təslim və razı olmaları üçün imanların gücləndir; Sənin narazılığına səbəb olan əməllərdən onları agah və uzaq et; Sənə layiqli itaət etmək üçün onlara qüvvət və iradə ver, Amin, ya Rabbil aləmin!